FEL kreyòl : pwomosyon, valorizasyon ak difizyon literati lang kreyòl, nan yon demach ranfòsman idantite lengwistik pèp kreyolofòn yo

FEL kreyòl : pwomosyon, valorizasyon ak difizyon literati lang kreyòl, nan yon demach ranfòsman idantite lengwistik pèp kreyolofòn yo

Soti 4 pou rive 18 desanm 2019, nan lide pou fè nou viv kreyòl la yon lòt jan, aprann enpòtans peyi Dayiti nan avni lang Kreyòl nan lemonn, ankouraje pwodiksyon literè kreyòl, aprann jèn yo plis bagay nan kesyon literati kreyòl, Inisyativ FEL Kreyòl pare yon latriye aktivite ki gen pou fèt nan plizyè vil nan peyi a.

RefAyiti

Pou premye fwa nan listwa lang kreyòl, Emisyon literè pawòl kreyòl, Vil Pòtoprens, Tigwav, Pòdpè, Jakmèl, Gonayiv mete tèt ansanm ak Fondation Maurice A. Sixto pou pote pou nou premye edisyon FEL Kreyòl ki se Festival Entènasyonal Literati Kreyòl.

Festival sila pote yon pakèt aktivite nan djakout li, tankou : yon gwo fwa liv kap rasanble mezon edisyon ak yon dividal otè ki pibliye liv ki ekri an kreyòl, plizyè konferans nan inivèsite, espas kiltirèl, lekòl, atelye, fòmasyon sou literati kreyòl Ayisyen, vizit nan prizon (Atelye, resital pwezi ak graje gita…)

Sa se tokèt la, chay la dèyè. FEL Kreyòl se yon inisyativ pou bay kreyòl la jarèt, pou fèl tanmen boujonnen epi ale pi lwen.

Aktivite sa a jwenn patisipasyon anpil gwo potorik moun tankou : Clotaire Saint, Natus, Manno Ejèn, Lyonel Trouillot, Nicole Cage, Frankétienne, Dominique Batraville, pou site sa yo sèlman. Ap gen lòt peyi envite tankou : Kiba ak Matinik.

RefAyiti

Ou menm, ki pale kreyòl, ki renmen lang kreyòl, vin aprann plis bagay sou literati lang lan. Festival sa gen yon estaf konsekan ki makònen konpentans yo pou reyalizasyon l, ladan yo : Anivince Jean Baptiste ki se prezidan; Marie Jocelyne Pierre, kòdonatris; Jessica Lee Nazaire kòm sekretè ak Clotaire Saint-Natus ki se prezidan donè.

Youn di lòt. Ann kore bèl inisyativ sa a. FEL Kreyòl, se moman kreyòl pa w la.

Phillerque Hyppolite

Étudiant-juriste, journaliste, citoyenne engagée.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Please wait...

Inscrivez-vous à notre lettre d'information

Voulez vous être notifié de nos derniers articles? Entrez votre nom et votre adresse électronique.